شعر: عبــدالله النــاعبي
تبقى الأمانـة والصدق زهوة الناس
والود والمعـروف وطيب الجمـايل
وراعي المـروه بين هالناس ألماس
مـن طيـب أصلـه تنتخيبه القبـائل
والحـر اللـي ربـوّته دوم عـ السـاس
تلقــاه فـي صـف القـروم الأوائــل
حرٍ حشيـم صميدعي طيـر قرناس
كالصقـر راقي فـوق روس الطـوايل
رجلٍ علـى الشـدات من قوته باس
محـزم ظهـر تلقــاه يـوم الهــوايل
مـاشـــابتــه سيـّــه دونٍ ولابــاس
ماخـاب من ينصـاه راعي الفضايل
دام المكــارم مـن عطـاياه تنقـاس
أنعــم وأكــرم يـاسليــل الحمـايل
حـاز الصداره واعتلـى قمـة الـرأس
مبخـوت مـا نالـه حميـد الشمـائل
أعني عزيــز القــوم شــاره ونبـراس
طيــب العـوايـد كلمتـه والفعــايل
حلو المحيا فـ لابتـه سمـت نوماس
زيـزوم ربعــه يــوم يلقـى الفصـائل
صيته شـراة العـود عـالثوب قرطاس
طيب النقـى وصفـه وريـح الخمايل
كالـديم مـن سيلـه يعطي بلا قياس
يسقـي أديــم الارض خيــرٍ همـايل
واختمت قولي عدما شاش هالرأس
وأعـداد مـاخطت حـروفي المسـائل
