شعر: عبدالله الحرابي
أنا حبيبك٠٠ قديم الحب والأول
ياليت تدري جنون الشوق فاضحني
لو كنت مره عن الأحوال بي تسأل
إن كان تدري غيابك كيف ذابحني
امعودني كل مارحت أو تزعل
أجيك لو هوه خطاك أقول سامحني
قلبي أعرفه غدى في حبك الأثمل
وانته مقرك حنايا القلب تاعبني
ايش فيك صاير لقلبي العاشق المهمل
ماظن قلبك حبيبي صدق ناسني
على جهازي أمنّي النفس واتأمل
لو هي رسالة أقول افلان ذاكرني
ياليت حظي واقع حلمي المقبل
من دون سابق تجي مره تواعدني
ياقو قلبك على الهجران متحمل
مازارك الحلم في نومك بتلمحني
ماكنت أنا غلاك وأنا بقلبك الأجمل
وكانت عيونك بتفضحني وتاسرني
من بعدما ما رحت غريبه حبنا تبدل
زمان وانته تموت لا من تباعدني
وَدي بنظرة عيونك أنت لو تقبل
إن كان لك حق تعال اليوم شارهني
تعال وأروي ورودك صايره تذبل
للحين باقي غلاك ما مات صدقني
مسموح لك في زوايا قلبي اتجول
وأعلن طواريك عاتبني وخالفني
فكك من البعد ازرار الجفا وأوصل
لو مرة من طرف شالك تعطرني
