شعر: يعقوب الحوسني ( يعقوبيات )
تغيّرتي علي مدري وشـ الداعي وشـ الأسباب
وارددها … مـ هو انت ِ العرفتك أول أيامي
علامك يا شهد عمري تباعدتي وصرنا اغراب
وصارت هالرسايل منك تمسح خطوة أقلامي
إذا عـ البعد لك نيّه فبغلق صفحة الواتساب
وننهي قصةٍ توها بدت تمشي عـ الأبهامي
قليبك دام ما حبني فلا يجبر على الإعجاب
ولكن ما أبي نهرك يمر جنبي وأنا ضامي
تعالي واشرحي وضعك وغلقي للسؤال أبواب
وقولي ايش بس تبغي وأمرك يصبح إلزامي
تبي ابعد (أنا حاضر) .. ولو قلبي بحبك ذاب
حرام إني اكدرك يوم وانتي عشقي السامي
حرام إني أعيش الوهم واحيا الواقع الكذّاب
واتخيّل جنان الحبْ .. أحلّق في سما اوهامي
تعالي وانهي القصة .. كذا وكذاك حن احباب
وعشره يوم أو أيام .. لكن تسوى أعوامي
لجل عينك ومن شانك أبطوي الأمس طي كتاب
مـ دام إنك فـ خير بخير طابت مجمل أيامي
وداع الله يا أحلى من عرفته والهوى غلاب
وداع الله يـ روح الروح وأول وآخر أحلامي
