شعر:
مصبح السيابي
سلام الله على الحاضر اقدم واجب التسليم
من الإسلام ماخذ له سلامٍ حاملٍ اسمه
علوم الخير في وجهي رساله جات للتعميم
بيقراها سموح الوجه واختمها أنا باسمه
أنا ثابت على مبدا ولاهو قابل التقسيم
عوايدنا وضوح الشمس مامالت إلى العتمه
بعدني بمحزمي واقف ولو باقي على البزيم
أبين وقفة اخلاصي ولو جسمي على عظمه
إذا توقف على روحي ترا روحي مع التقديم
تسام الروح للغالي شرا الأوطان أو عصمه
أنا عماني على الطيبه حدودي فاقت الترسيم
أنا رسومي من أجدادي طباعي برسمهم دسمه
سلامي لكل من ورث سمات الطيب للتعليم
تفاسيرٍ على الهيثم عمان تسير في رسمه
تهانينا ي سلطاني سلامي لك مع التعظيم
يحق لكم جلالتكم سلام تحفه النسمة
