شعر:
مصبح السيابي
جيتك مريضٍ والشعر عكاز لي ودي الوصول
ودي بعذرا من بنات الفكر تتزوج قصيد
متوكأ بقافي المتين اللي عسى إنه يطول
إعجاب شخصٍ لي أحبه وهو دخل قلبي الوحيد
ياليتها العذرا بتنجب قاف ويهز العقول
متفرد الحبكة ويصبح للشعر نعم العقيد
مغرم وهايم مثل طيرٍ لفّ بجناحه الحقول
متعشمٍ في غلصمه يملي حبيبات الحصيد
ماخانته الريح أو أن الحقل له باب وقفول
لكن حصاد الحب بعده موسمه شويه بعيد
ويرد بخماص البطن لانه مضيعها الفصول
ياكل ملامه م الجهاله ليت له درسٍ مفيد
ياعصر مررني على غيه بها دن الطبول
متناغمه ببحر الشعر من حلوها أرزف سعيد
ياعمر سلفني الصغر قلبي شتها إني أقول
الكبر والأسقام عائق عن أسوي ماأريد
