شعر: مصبح السيابي
عسى الأشواق في قلبك تغني لك غنا فيروز
تغني الصبح (سلم لي عليه) اللي شغل كلي
واروز الشوق في عينك واحساسك اروزه روز
لعلي من صدوق الشوق ألاقي دمعك يهلي
تعال ووطّن البسمه على شفاتي أنا ملزوز
فقير القلب م الفرحه أباك اليوم تحسن لي
تعال واطرب بصوتك وأقول الصوت ذا محروز
شحارير الغنا طاحت على ألحانك تدن دن لي
إذا تجيني إلى السلان تسقيني الوفا من كوز
امطرك حب من مزنه نوابعها من الشلي
وحفك في تعاصيرك بعاضد ورد وله موز
أبا زرع المحبه فوق يتشابك ويغتل لي
أبا أجني ثماره اليوم ولكني زرعت الجوز
يبا له سنين انتظره إلى أنه بيثمر لي
أنا منك سهر ليلي يطالبها عيوني حوز
يقول الليل بغيابي مريح البال مثل لي
