محمد خليفة الهنداسي – ود القصاد
مالي على فرقاه حيله ☆☆☆ الخل بو عشرين وثمان
خذ مهجتي الله وكيله ☆☆☆ واشعل وساط القلب نيران
أول إذا يزعل أجيله ☆☆☆ واطلب أنا منه السمحان
والقلب لا ضاق اشتكيله ☆☆☆ وهو السبب وأكون غلطان
في الناس ما بدل بديله ☆☆☆ وفي الكون ما يشبهه انسان
كل الصفات اللي أصيله ☆☆☆ حائز عليها دعج الأعيان
واليوم همي من يشيله ☆☆☆ بدل محبتنا بنكران
وش لي حصل غيب دليله ☆☆☆ وضيّع محبة ذيك الأزمان
حاله معي ذكرى جميله ☆☆☆ وصوره رسمتها يد فنان
ومن الحزن عيني هميله ☆☆☆ والجسم من فرقاه تعبان
لكن ما باليد حيله ☆☆☆ غير الصبر على الخل زعلان
لابد يوم يرجع دليله ☆☆☆ واعيش قربه دوم فرحان
ياالله عسى سيل ومخيله ☆☆☆ تسقي الديار وكل عطشان
وتقوم أشجار ضليله ☆☆☆ وموز الغتل ثامر ورويان
و الخاتمه ذكرى جميلة ☆☆☆ مرت على الخاطر من زمان
