شعر: جاسم الركاض أبو خالد
عشرين عام ومحتفظ في ألبومي على صوره
أضمها من اللهفه و لكن روحي مأسوره
تمر سنين ما أشوفه ولا نلتقي صدفه
ما غير بوسط أحلامي يلامس كفي بكفه
خياله يزيح أحزاني وتبقى الروح مسروره
تصور لو حقيقه تجي حبيبك مره وتزوره
بتنعش بالفرح قلبي بعد ما كان في ضعفه
وصوتك يرد لي روحي أنغام العشق عزفه
وتنبت ورود الحب ٠٠ ونقطف منها قوره
ويتخالط دخون العود مع ريحة شذا عطوره
ياليت الحلم يتحقق ويجي محبوبي بلطفه
يداعب همس الشوق ويأخذني على عطفه
أنا مليت من ليلي متى يلفي الفجر نوره
ويعكس ظلام الليل شعاع الشمس بلوره
تفارق كل منا بدرب بعد ماكان كتفي بكتفه
كأنه ناسي العشره عهود الحب لي وحلفه
وصار ذاك العشق بقايا من صدى صوره
إذا مرتني الذكرى أضمها لهفه بروح مأسوره
