رثاء في فقيد الغليل
خليفه بن خميس بن سيف الهنداسي رحمة الله عليه
شعر: عبدالله الحرابي
أنا فقيدك ياخليفه ومجروح
والله يعلم من فراقك أعاني
اللي غلاك بداخل القلب والروح
ما ينتسي ذكراك لين الدفاني
هذا القدر ياخوي من هين بتروح
والموت ع الإنسان والعمر فاني
كلٍ حله يوم ومكتوب ف اللوح
والآدمي يصبر فـ وقت المحاني
تدري فراقك ديرتك كلها تنوح
تبكيك يبو بشار بوسط المحاني
وأنا عيوني تهل بالدمع منضوح
يوم الوداع ياليت دمعي كفاني
أناظرك وانته على الغسل مطروح
كنه رماح الموت سهمه رماني
ولا بوسط القبر لك عطرٍ ايفوح
والنور في قبرك يشع المكاني
ادعي إلهي خالقي منشي الروح
يا من خلق دنياه وسبع المثاني
عليه شكوى الخلق والهم والبوح
ربٍ كريم رحمتة في ثواني
نام بسلام وبجنتك صرت مربوح
وتهنى بجنات السعد والحسانِ
الله رضاه وبحكمته يسكن الروح
ما بين نور وبين روض الجنانٍ
