شعر:
يعقوب بن سعيد الحوسني ( يعقوبيات )
يا موت غيّبت السنا من وسط دار
وخليت دنيا الشعر تبكي الراعبيّه
وينك حمد؟ كل القصايد في انكسار
والقاف ما عاد انكتب من بعد حيّه
كنت الحكي لا صار للمعنى وقار
وكنت السكون اللي يعلّمنا الرويّه
ما مدّ لك مدح الزمن شبر اعتبار
والا التفتّ للي يبي نجمك هويّه
تمشي خفي، وفعولك النجمة تغار
وسيرتك دايم طويلة في القريّه
نبكيك يا طيب السجايا والصّغار
والكلمة اللي قلتها، تبقى نقيّة
يا ساكتٍ في صمته أفعال الكبار
ويا صادقٍ ما خان درب المبدعيّه
نرثيك لا والله.. نرثي بك نهار …
كنه فقد والليل به شمسه و ضيّه
تغيب .. بس إنّك على الدنيا منار
وسيرتك تبقى على الساحه نقيّة
تبقى ولا يمحي خطاويك الغبار
ما دامت قلوب الرجاجيل الوفيّه
